सुलोचनादीदींना ' महाराष्ट्र भूषण ' पुरस्कार जाहीर

आपल्या सहजसुंदर अभिनयाने मराठी चित्रपटातील ' आई ' आणि हिंदी सिनेसृष्टीतील ' माँ ' जिवंत करणा-या बुजूर्ग अभिनेत्री सुलोचनादीदी यांना २००९ सालचा ' महाराष्ट्र भूषण ' पुरस्कार जाहीर झाला आहे. येत्या २६ जानेवारी रोजी समारंभपूर्वक त्यांना हा पुरस्कार देऊन गौरवण्यात येणार आहे.

महाराष्ट्र सरकारच्या वतीने दिल्या जाणा-या या सर्वोच्च नागरी पुरस्कारासाठी ज्येष्ठ अभिनेत्री सुलोचना यांची आज निवड करण्यात आली. मुख्यमंत्री व सांस्कृतिक कार्यमंत्री अशोक चव्हाण यांच्या अध्यक्षतेखाली निवड समितीने हा निर्णय घेतला. ५ लाख रुपये रोख, सन्मानचिन्ह व मानपत्र असे या पुरस्काराचे स्वरूप आहे. २६ जानेवारी २०१० रोजी या पुरस्काराचे वितरण पार पडणार आहे.

महाराष्ट्रासाठी महत्त्वपूर्ण योगदान देणा-या व्यक्तीला दरवर्षी महाराष्ट्र भूषण पुरस्काराने गौरवण्यात येते. यापूर्वी पु. ल. देशपांडे, लता मंगेशकर, सुनील गावस्कर, भीमसेन जोशी, सचिन तेंडुलकर, रतन टाटा, मंगेश पाडगावकर, नानासाहेब धर्माधिकारी, अभय व राणी बंग, विजय भटकर आदी मान्यवरांना या पुरस्काराने सन्मानित करण्यात आले आहे.

सुलोचनादीदींचा जन्म ३० जुलै १९२८ रोजी झाला. ख्यातनाम दिग्दर्शक भालजी पेंढारकर हे त्यांचे गुरू. त्यांच्याच तालमीत सुलोचनादीदींना अभिनयाचे धडे गिरवले. २५० हून अधिक मराठी तसेच हिंदी चित्रपटात त्यांनी आपल्या अभिनयाची छाप पाडली. वहिनीच्या बांगड्या, मीठ भाकर, धाकटी जाऊ हे त्यांचे काही गाजलेले चित्रपट. मराठी चित्रपटातील त्यांच्या ' आई ' च्या व्यक्तिरेखा विशेषत्वाने गाजल्या. ७० तसेच ८० च्या दशकात हिंदी सिनेसृष्टीत निरूपा रॉय यांची ' माँ ' गाजली होती. त्यांच्यानंतर सुलोचनादीदींनीही माँ म्हणून हिंदी सिनेसृष्टीत आपला वेगळा ठसा उमटवला.